البيتزا السحرية
البيتزا، تلك الوجبة المفضلة للصغار و الكبار، حتى من سلاحف النينجا، كلنا بنعشقها و بتمثلنا أحلى وجبة بنأكلها بإستمتاع😋، فلو نفسك هفت عليكي ببيتزا لذيذة كدة مرة واحدة و مفكيش حيل تقومي تعجني، او حتى الميزانية مخرمة😁، هقولك على طريقة سهلة و كأنك بتاكليها من أفخم مطعم للبيتزا.
أول حاجة الصلصة:
- الخطوة 1
هتجيبي أي حلة صغنونة، وهتشوحي ثوم مقطع صغير أوووي في زيت بسيط.
المقادير:
- أي نوع صلصة عندك أو طماطم مهروسة.
- رشة ملح و فلفل أسود.
- نص ملعقة سكر.
- ملعقة صغيرة زعتر ناشف (بهارات).
- ملعقة زيت زيتون،و لو معندكيش خودي عادي من الزيت ال بيكون الزيتون محطوط عندك عادي.😉
- ملعقة كاتشب.
وهتسيبها على نار هادية لحد ما تتسبك.
سر العجينة السحرية🌟
- الخطوة 2
عندك إختيارات:
- فينو (صمون).
- توست.
- خبز أبيض.
نقي حاجة من التلاتة 😄
بس يا سيتي وهتجيبي بقا إختيارك من العجينات ال فوق دول و الل عندك في البيت.
- الخطوة 3
هتحطي الصلصة على العجينة المختارة + جبنة موتزريلا ،أو أي نوع مكس جبن عندك، فنني 😎
- الخطوة 4
الإضافات بردو براحتك:
- زيتون.
- بيبروني.
- ممكن لانشون.
- تركي.
- قطع دجاج أو لحمة عندك في الثلاجة متبقيين من أكلة تانية.
- سوسيس (نقانق).
- سجق.
- بسطرمة.
- ممكن تقلي بيضة و تحطيها فوقيها (إختراع جربتو و نجح الصراحة 😋).
- و ممكن عادي تكتفي بالصلصة و الجبنة.
- الخطوة 5
ثم تقومي بوضع الإضافات المفضلة عندك، ثم تسخينها في الميكرويف لمدة دقيقة وكله يسيح مع بعضه.
- الخطوة 6
لو حابة تبقا مقرمشة من تحت، هاتي طاسة وإدهنيها بالقليل من الزيت مع رشة زعتر، وضعيها على النار حتى تأخذ العجينة وجه كرسبي من تحت.😎
✅ وتقدم ساخنة ولذيذة.😌
🍴 وصحتين وعافية على قلبكم.😍
معلومات في السريع:
- زمان في بلاد فارس كان الجنود بيخبزوا العجين مع التمر والجبن على دروعهم لتناول الطعام.
- والإغريق القدماء بردو كان بيخبزوا العجين وبيحطوا فوقه البصل والجبن والبصل والثوم.
- كل واحد كان بيبتكر البيتزا الخاص بيه زمان ولحد دلوقتي.😃
إرسال تعليق